Egla, 39

Kafli 39

Geir fékk Þórunnar

Það varð til tíðinda meðan Þórólfur hafði verið utanlendis en Skalla-Grímur bjó að Borg að eitt sumar kom kaupskip af Noregi í Borgarfjörð. Var þá víða höfð uppsát kaupskipum í ár eða í lækjarósa eða í sík. Maður hét Ketill er kallaður var Ketill blundur er átti skip það. Hann var norrænn maður, kynstór og auðigur. Geir hét son hans er þá var fulltíði og var á skipi með honum. Ketill ætlaði að fá sér bústað á Íslandi. Hann kom síð sumars. Skalla-Grímur vissi öll deili á honum. Bauð Skalla-Grímur honum til vistar með sér með allt föruneyti sitt. Ketill þekktist það og var hann um veturinn með Skalla-Grími.

Þann vetur bað Geir son Ketils Þórunnar dóttur Skalla-Gríms og var það að ráði gert. Fékk Geir Þórunnar. En eftir um vorið vísaði Skalla-Grímur Katli til lands upp frá landi Óleifs með Hvítá frá Flókadalsárósi og til Reykjadalsáróss og tungu þá alla er þar var á milli upp til Rauðsgils og Flókadal allan fyrir ofan brekkur. Ketill bjó í Þrándarholti en Geir í Geirshlíð. Hann átti annað bú í Reykjadal að Reykjum hinum efrum. Hann var kallaður Geir hinn auðgi. Hans synir voru þeir Blund-Ketill og Þorgeir blundur. Þriðji var Þóroddur Hrísablundur er fyrstur bjó í Hrísum.