Njála, 154

Chapter 154

TITLE.

ENSKA

Kafli 154

Tóku þeir Friðarey. Hún er á milli Hjaltlands og Orkneyja. Við Kára tók sá maður er hét Davíð hvíti. Hann sagði Kára allt um ferðir þeirra Flosa slíkt sem hann hafði vís orðið. Hann var hinn mesti vin Kára og var Kári með honum um veturinn. Höfðu þeir þá fréttir vestan úr Hrossey allar þær er þar gerðust.

Sigurður jarl bauð til sín að jólum Gilla jarli mági sínum úr Suðureyjum. Hann átti Svanlaugu systur Sigurðar jarls. Þá kom til Sigurðar jarls konungur sá er Sigtryggur hét af Írlandi. Hann var sonur Ólafs kvarans en móðir hans hét Kormlöð. Hún var allra kvenna fegurst og best að sér orðin um það allt er henni var ósjálfrátt en það var mál manna að henni hafi allt verið illa gefið það er henni var sjálfrátt.

Brían hét konungur sá er hana hafði átta og voru þau þá skilin því að hann var allra manna best að sér. Hann sat í Kantaraborg á Írlandi. Bróðir hans var Úlfur hræða, hinn mesti kappi. Fóstri Bríans hét Kerþjálfaður. Hann var son Kylfis konungs þess er margar orustur átti við Brían konung og stökk úr landi fyrir honum og settist í stein. En þá er Brían konungur gekk suður þá fann hann Kylfi konung og sættust þeir þá. Tók Brían konungur við syni hans Kerþjálfaði og unni meira en sínum sonum. Var hann þá roskinn er þetta er tíðinda og allra manna fríðastur. Dungaður hét son Bríans konungs en annar Margaður, þriðji Taktur, þann köllum vér Tann. Hann var þeirra yngstur en hinir eldri synir Bríans konungs voru frumvaxta og manna vaskastir. Ekki var Kormlöð móðir barna Bríans konungs. En svo var hún orðin grimm Bríani konungi eftir skilnað þeirra að hún vildi hann gjarna feigan. Brían konungur gaf upp þrisvar útlögum sínum hinar sömu sakir. En ef þeir misgerðu oftar þá lét hann dæma þá að lögum. Og má af slíku marka hvílíkur konungur hann hefir verið.

Kormlöð eggjaði mjög Sigtrygg son sinn að drepa Brían konung. Sendi hún hann nú til Sigurðar jarls að biðja hann liðs. Kom Sigtryggur konungur fyrir jól til Orkneyja. Þar kom þá og Gilli jarl sem fyrr var ritað.

Svo var mönnum skipað að Sigtryggur konungur sat í miðju hásæti en til sinnar handar konungi sat hvor jarlanna. Sátu menn þeirra Sigtryggs konungs og Gilla jarls innar frá en utar frá Sigurði jarli sat Flosi og Þorsteinn Síðu-Hallsson og var skipuð öll höllin.

Sigtryggur konungur og Gilli jarl vildu heyra tíðindin þau er gerst höfðu um brennuna og svo síðan hún var. Þá var fenginn til Gunnar Lambason að segja söguna og var settur undir hann stóll.