Njála, 113

Chapter 113

TITLE.

ENSKA

Kafli 113

Maður er nefndur Guðmundur hinn ríki er bjó á Möðruvöllum í Eyjafirði. Hann var Eyjólfsson, Einarssonar, Auðunarsonar rotins, Þórólfssonar smjörs, Þorsteinssonar skrofa, Grímssonar kambans. Móðir Guðmundar hét Hallbera dóttir Þórodds hjálms en móðir Hallberu hét Reginleif dóttir Sæmundar hins suðureyska. Við þann er kennd Sæmundarhlíð í Skagafirði. Móðir Eyjólfs, föður Guðmundar, var Valgerður Runólfsdóttir. Móðir Valgerðar var Valbjörg. Hennar móðir var Jórunn hin óborna dóttir Ósvalds konungs hins helga. Móðir Eyjólfs var Helga dóttir Helga hins magra er nam Eyjafjörð. Hann var son Eyvindar Austmanns og Raförtu dóttur Kjarvals Írakonungs. Móðir Helgu, dóttur Helga, var Þórunn hyrna dóttir Ketils flatnefs, Bjarnarsonar bunu, Grímssonar hersis. Móðir Gríms var Hervör en móðir Hervarar var Þorgerður dóttir Háleygs konungs af Hálogalandi.

Þorlaug hét kona Guðmundar hins ríka, dóttir Atla hins ramma, Eilífssonar arnar, Bárðarsonar í Ál, Ketilssonar refs, Skíðasonar hins gamla. Herdís hét móðir Þorlaugar, dóttir Þórðar Höfða-Bjarnarsonar byrðusmjörs, Hróaldssonar, Hróðlaugssonar hryggs, Bjarnarsonar járnsíðu, Ragnarssonar loðbrókar, Sigurðarsonar hrings, Randvéssonar, Ráðbarðssonar.

Móðir Herdísar Þórðardóttur var Friðgerður dóttir Kjarvals sonar Írakonungs.

Guðmundur var höfðingi mikill og auðigur. Hann hafði hundrað hjóna. Hann sat yfir virðingu allra höfðingja fyrir norðan land svo að sumir létu bústaði sína en suma tók hann af lífi en sumir létu goðorð sín fyrir honum. Og er frá honum komið allt hið mesta mannval á landinu: Oddaverjar og Sturlungar og Hvammverjar og Fljótamenn og Ketill biskup og margir hinir mestu menn.

Guðmundur var vinur Ásgríms Elliða-Grímssonar og ætlaði hann þar til liðveislu.