Njála, 079

Chapter 79

TITLE.

ENSKA

Kafli 79

„Nú skulum við fara,“ segir Skarphéðinn, „þegar í nótt því ef þeir spyrja að eg er hér þá munu þeir vera varari um sig.“

„Þínum ráðum vil eg fram fara,“ segir Högni.

Eftir það tóku þeir vopn sín þá er allir menn voru í rekkjum. Högni tekur ofan atgeirinn og söng í honum hátt.

Rannveig spratt upp af æði mikilli og mælti: „Hver tekur atgeirinn þar er eg bannaði öllum með að fara?“

„Eg ætla,“ segir hann, „að færa föður mínum og hafi hann til Valhallar og beri þar fram á vopnaþingi.“

„Fyrri muntu nú bera hann og hefna föður þíns því að atgeirinn segir manns bana, eins eða fleiri.“

Síðan gekk Högni út og sagði Skarphéðni orðræðu þeirra ömmu hans.

Síðan fara þeir til Odda. Hrafnar tveir flugu með þeim alla leið. Þeir komu um nótt í Odda. Þeir ráku fénað heim á húsin. Þá hljóp út Hróaldur og Tjörvi og ráku féið upp í geilarnar og höfðu með sér vopn sín.

Skarphéðinn spratt upp og mælti: „Eigi þarft þú að að hyggja, jafnt er sem þér sýnist.“

Síðan höggur Skarphéðinn hann banahögg. Hróaldur hafði spjót í hendi og hleypur Högni að honum. Hróaldur leggur til Högna. Högni hjó í sundur spjótskaftið með atgeirinum en rekur atgeirinn í gegnum hann. Síðan gengu þeir frá þeim dauðum og snúa þaðan upp undir Þríhyrning. Skarphéðinn hleypur á hús upp og reytir gras og ætluðu þeir er inni voru að fénaður væri. Tók Starkaður og Þorgeir vopn sín og klæði og fóru út og upp um garðinn. En er Starkaður sér Skarphéðin hræðist hann og vildi aftur snúa. Skarphéðinn höggur hann upp við garðinum. Þá kemur Högni í móti Þorgeiri og vegur hann með atgeirinum.

Þaðan fara þeir til Hofs og var Mörður á velli úti og bað sér griða og bauð alsætti.

Skarphéðinn sagði Merði víg þeirra fjögurra.

Skarphéðinn kvað vísu:

26. Vér höfum fellda fjóra

fleinstýranda dýra;

þeim skaltu, beiðir, beimum,

bylgju logs, of fylgja.

Kúgum karl, svo að ægi

kaldráðum hlyn skjalda,

aumur sel þú alla dóma

auðrunnur syni Gunnars.

„Og slíka för,“ segir Skarphéðinn, „skaltu fara eða selja Högna sjálfdæmi ef hann vildi taka.“

Högni kvaðst hitt hafa ætlað að sættast ekki við föðurbana sína en þó tók hann sjálfdæmi um síðir.